RAM LEH HNAM HUMHALH

RAM LEH HNAM HUMHALH

- Hruaia Chhangte

            Khawvel awm chhung leh mihring kan dam chhung zawnga pawimawh reng tur pakhat awmin a lang. Chu chu eng nge kan tih chuan “Ram leh Hnam” tih hi a ni. Ram a awm chuan hnam a awm tel ṭhin a, hnam chu ram tel lo chuan a awm ngawt thei lo bawk. Thil inkungkaih nghet tak a nih avangin he thil pahnih han khawvel a siam tih kan hre ṭheuhin a rinawm. Ram chu hnam hrang hrangte chenna hmun pakhat lo ni ta se, a chhunga chengte chu mi chi hrang hrang chi inang lo tak tak pawh an nih theih avangin, chu'ng chi peng hrang hrangte chuan an nihna humhalh an duh ṭhin. Hei hi tun thlenga kan sawi luai luai chu a ni reng a, a pawimawh em em a, a la pawimawh dawn chauh tih a lang reng mai.

            Ram leh hnam humhalh chu eng nge tia kan inzawh chuan, kan ram (Mizoram) bik lo thlur ta ila; kan ram neih chhun vawnhim te, a leilung humhima humhalh hrim hrim te, a chhunga cheng nungcha leh mihring chengte dam tlanna leh inpumkhatna tura hma lak te ti ila kan sawi sual tam awm lo ve. Mizoram chu Mizote ram neih chhun, chenna atana ram neih chhun a nih tlat avangin ram dang leh hnam dangte chimral loh nan venhim leh humhalh a lo ṭul a ni. Tin, kan ram leilung ngei pawh chu humhalh a lo ṭul ta. Ram leilung hausakna - ramngaw thing leh mau, lei hnuai hausakna (minerals) te thleng hian humhalh a lo ṭul hle a ni.

            Kan ram leilung hausakna te chu ram changkang leh hausa zawkten a leilung hausakna an rawn hai chhuah a, kan ram leilung tui hâng an rawn thal zawh mai loh nan kan lo venhim ve pawh a ṭul tihna a ni. Chu chu lo dahṭha ta ila, keini Mizote ngei pawh hian kan ram kan humhalh a ngai, thingtlang lama lo neia eizawngten ramngawt an vat chereu a, heng thing leh mau an kih thluk tawhte hnawh khat leh tura thing leh mau phun belh pawh hi kan ram leilung humhalh nan chuan a sawngsawhlawt em emin a rinawm.

            Mizorama cheng zawng zawngte hi ‘Mizo’ tia sawi kan ni vek a, Mizoram chu Mizote chenna ram tih a nih tlat avangin Mizo hnam awm khawmna chu Mizoram tia sawi a ni ang. Hnam humhalh kan tih chuan, Mizoram chhunga cheng Mizo hnam chi peng hrang hrangte nihna humhalh a, nihna ṭheuh chhawm nun zel hi a ni mai a. Mizo kan ni a, kan Mizo hnam zia leh nundan te, ei leh in, thuam hrang hrang kan chawi lar a, hman uar zel hi hnam humhalh nana pawimawh tak zinga mi a ni thei ang. Heng bakah hian kan ṭawng humhalh te, zai leh lam kan neihte humhalh zel hi a pawimawh leh hle bawk.

            Engtin nge ram leh hnam chu kan humhalh ang? Hei hi zawhna pawimawh tak a ni. Kawng tam tak a awm thei ang a, chung zingah chuan kan ram leilung ngei humhalh hi a pawimawh langsar zual a ni kan ti lo thei lo ang. Kan sawi tawh ang khan a bikin thingtlang lamah chuan lo neia eizawngten ram an vat chereu a, hei hi ram humhalh nana tihtawp tuma hmalak tur emaw kan ti ṭhin a, mahse a lo ni lo; thingtlang mite eizawnna ber tihchhiat a, dodal ngawt hi kristian tih tur a ni chiahin a rinawm loh hle. Chumi aiah chuan lo neituten ram chu lo vat zel pawh ni se, an vah chereu zozaite rawn thlak a, rawn hnawh khat leh turin thing leh mau kan phun belh mai tur a ni, hei hi sawrkar lam thu neituten chak takin hma an la ang a, sawrkar chauh ni lovin mimal pawhin theihtawpin thing phun kan uar ang a, chhungkaw tinin hei hi kan uar zel chuan ram nuam tak kan nei leh mai dawn a lo ni.

            Awle, ram leh hnam humhalh chu kan sawi tawh a, a humhalh dan tur ni thei pawh kan hre ṭeuh a, mahse hriat ringawtah hian thil zawng zawng hi a tawp lo va, hriat tama chet chhuahpui lo chu a thlawn mai a ni a. Hriat tam ai chuan hriat chhun chhun pawh a taka chet chhuahpui zel mai hian kori a tu zawk fe a ni. Ram leh hnam humhalh kawngah pawh hian kawng harsa lo te te zawh ngai a awm a, chungte chu naupang aṭanga tar chak lo zawngte thleng pawhin tihtur (duty) kan nei thei vek a. Chungte chu ngai pawimawha kan tih theih tawk ṭheuh kan tih hian thil hi siam ṭhat zel theih a ni. Marka 14:8-a kan hmuh, “A tih theih tawk a ti a ni” tih ziak ang hian mi tin kan Ram leh Hnam humhalh turin kan tih theih tawk ti ṭheuh vek ila chuan hnam ropui kan ni ang a, ram nuam kan nei mai dawn a lo ni.