ṬHALAITE HI

Ṭhalaite hi

- Hruaia Chhangte

            Khawvelah hian mi chi hrang hrang kan awm a. Naupang aṭanga puitling leh  pitar/putar kan cheng za a. Mi chi hrang hrang kan awm a, chung zingah chuan Ṭhalaite hi mi pawimawh leh ṭangkai tak tak an ni ṭhin. Amaherawhchu, chung chu hre lovin leh ṭhalai awmzia pawh hi hre lovin kan nung mai mai a; Pathian min duan dan hi kan bawhpelh nasa em em tawh a ni.

        Pathian thu-ah chuan, “Ṭhalaite u, in ṭhat lai chen ula, i la naupan viau lai hian hlim rawh u, Amaherawhchu Pathianin in chungah ro a rêl dawn tih hre reng ang che u.” (Thuhriltu 11:9) kan hmu a. Hei hi kan ngaihtuah chiang lo a ni maithei, engtin nge kan dawnsawn tih hi inngaihtuah chian a ṭul khawp mai.

        Ṭhalai kan nih chuan kan zalen a, kan duh duh danin kan awm thei ngei mai. Pathian duhzawng a ni emaw, a ni lo emaw, kan duh duhin kan awm thei ngei mai. Mahse, Pathian thu hian ‘Amaherawhchu’ tih thumal a dah chhan hi eng nge ni ta ang? Eng dang ni lovin Pathianin damna leh ṭhat lai kan chen theihna tura hriselna leh damna min pek hi Ama tan bawka hmang tura min duh vang a ni. Hei hi kan hriat ṭheuh mah ni se kan hriat piah lama kan nunpui a ngaih tlat vang a ni.

        Kan Zoram hi kan thlir chuan mi awm ṭha duh lo leh thuawih lo te, Ruihhlo leh nulat tlangvalna hmanga an ṭhat lai hmang a, Pathian dodal zawnga an hun hmang an tam hle mai. Pathian thua kan hmuh, “. . . Amaherawhchu Pathianin in chungah ro a rêl dawn tih hre reng ang che u.” a tih hi hrechiang ngat ila chuan Pathian duh loh zawnga an nun an hman bik a rinawm loh.

        Tunah hian ṭhalai kan nih chuan ‘Ṭhalai’ tih awmzia hi kan ngaihtuah chian a ngai hle mai. Pathianin ṭhalaite hi thil ṭha lo leh a duh loh zawng ti tura a duan a ni lo tih a chiang nghal em em a. A ‘ṭha lo’ ni lovin, a ‘ṭha’ lam zel ti tur leh chutiang taka nung tura ṭhalai tia koh kan ni si a. Thil dik leh ṭha te, rinawm leh belhchian dawl te hi kan nunpui tur a ni a. Hemi ep chiah hi tunlai ṭhangtharte hian kan nunpui leh kan kalkawng chu a ni leh lawi si.

        Pathianin kan chunga ro a la rel dawn avangin tun aṭang hian dik leh rinawm taka kan nun a ngai tawh a. Kan pi leh pute chuan ṭhenawm te leh mi dang an bul hnaia mite tana malsawmna leh rawn tlak nih an tum tlat ṭhin a. Tin, taimak leh tumruhna te, tlawmngaihna te hi an nunpui a. Chung zawng zawng chu thil ṭha a nihzia pawh kan hre ṭheuh mai. Nula tlangval, ṭhalaite chuan tlawmngaihna leh rinawmna an nunpui a, taima takin an nun an hmang ṭhin.

        Tuna ṭhalaite hi chuan hengte hi kan hlamchhiah lek lek tawh a, a pawi hle mai. Taimak aiah thatchhiat, tlawmngaih aiah awm àwl, tumruh aiah beidawn, rinawmna aiah rukruk; hengte hi tunlai ṭhalaite nihphung a lo ni ta hial mai. Amaherawhchu, hman aṭanga tun thleng hian taimak leh tumruh avanga chawimawi tlak te, tlawmngaih avanga fak phu hliah hliah te an kal nuk tho mai. Mahse, hei a tawk mai lo; ṭhalaite hian Mizo nunphung leh zia te kha kan chawi vul a ṭul hle mai.

            Nu leh pa te leh upa zawkte chuan ṭhalaite chungah an rilru an nghat a. Ṭhalaite hi innghahna tlak ni turin an duh ṭhin. Engvang nge? Ṭhalaite chu kawng tam taka tha chak leh zuan zang zawk an nih ṭhin vang a ni. Pathian rawngbawlna leh kohhran enkawl chungchangah pawh ṭhalaite hi sulsu tura pawimawh leh ṭangkai ber ber tur kan nih vang a ni. Engpawh ni se la, kan ṭhat lai leh kan la naupan viau laia Pathian theihnghilh lova a duhzawnga kan nun phawt chuan, kan ṭhat lai hun hian malsawmna chhiar sen lohvin min um zui dawn a ni. Ṭhalaite chuan Pathian thu anga a ‘ṭha’ lam zel ti a, sum tam tak aia hmingṭhatna kan um hi a ṭul tawh takzet a ni.